Mat 7 | ATA | STEP | Mamu sou ngatilovosou 'ilixoi'a ta menexinge, mo sou Lataua utilovosou 'ili'ilixomengi uasi.

a 7:1Rom 2:1; 1Ko 4:5; Iak 4:11-12

b 7:2Mak 4:24

c 7:7Mak 11:24; Ioa 14:13, 15:7, 16:23-24

d 7:81Ioa 3:22, 5:14-15

e 7:11Iak 1:17

f 7:12Mat 22:39‑40; Luk 6:31; Rom 13:8-10

g 7:15Mat 24:24; Apo 20:29; 2Pi 2:1

h 7:16Xal 5:19‑22; Iak 3:12

i 7:19Mat 3:10; Luk 3:9; Ioa 15:6

j 7:20Mat 12:33

k 7:21Luk 6:46; Iak 1:25

l 7:23Lex 6:8; 2Ti 2:19

m 7:29Mak 1:22; Luk 4:32

Matthew 7

Mamu sou Ngatilovo sou 'Ili'ilixo Noxi'a ta Mitema Ane Va'axu

(Luk 6:37-38, 41-42)

1 ^aMamu sou ngatilovosou 'ilixoi'a ta menexinge, mo sou Lataua utilovosou 'ili'ilixomengi uasi. 2 ^bXo Lataua utilovosou 'ili'ilixomengi iou vilesisi aloxo ngingi ngetilovosou 'ili'ilixoi'a ta menenginge ne. Mo utilovosou 'ili'ilixomengi iou vilesisi aloxo ngingi ngetilovosou 'ili'ilixoi'a ta menexinge. 3 Ia tava'u loxovaa la sou namaisou 'ili'ili se'i no iou itema vile noxou Lataua e anu loxo vivine, ia nini namaisou ovu alelaxu e muxolu no ieni ne ua. 4 Nini namaisou ovu alelaxu uxolu no ieni uasi io loxovaa la sou navikalanu vivine lexe, ‘Vivilo ieni uvaxailosi mo axexeenu, 'ili'ili no ieni.’ 5 La nini loxo itema sou kalavoi manina, tei la nini naxexeenu ovu alelaxu no ieni 'o, ka sou namalei lamana laixe la sou naxexeenu 'ili'ili se'i noxou vivine iou ne. 6 Mamu sou naa'aane'i ta a'aa no 'a mimii ane malemalenga, mo mamu sou ngingi ngasu'anu tualemengi ulai noxi'a ta memee. Lexe ngingi nga'oxonu aloxo ne la ane'i imalamalaxo'u no tava'a, xe ukalu la ixiu une'e noxinge la ingangasinge mo iteateangengi.

Ngalinga mo Ngakamuli Xe Ngapolopolo

(Luk 11:9-13)

7 ^cLexe ngalinga utotomu noxou Lataua la Anu ulosinge mo ngakamulinu utotomu la ngaxalisou xe ngapolopolo noxou utotomu la ukisiinu aitenga noxinge. 8 ^dLa sou ane'i ane ilinga noxou utotomu la Anu ulosi'a mo ane'i ane ikakamulinu utotomu la ixalisou, xe ane'i ane ipolopolo utotomu la Lataua ukisiinu aitenga noxi'a. 9 'Ena'ei noxinge 'olu ulingau veleti la anu ulosou lavo'o? Male uasi. 10 Mo lexe ulingau sinana la anu ulosou sinanaveveeni? Male uasi. 11 ^eAloxo ngingi ta mitema ta masua, ia ngelavusou ngalosi'a ta 'ilinge mimii lailaixesi. La sou loxovaa noxou Maminge ane muxolu teitexi no opo loxotolo ulavusou ulosi'a ane'i ane ilinga mimii lailaixe. 12 ^fLa nga'oxonu mii ulai noxi'a ta mitema aloxo ngingi ngemasaxa lexe ane'i i'oxo une'e noxinge ne. Xo mimii ane ne mikaukavunu muai no nano no anu lavukusou lapuloto noxi'a ta mitema sou palomatana.

Aitenga Kitu'a Xe Aitenga Tatila

(Luk 13:24)

13 Mo ngingi xavingengi sou nga'unalai no anu aitenga kitu'a. Xo aitenga mo vote'i ane ulai no anu taxasou navunavu ne toxoxa'a, la anu se'isisi noxi'a ta mitema tavu'alo sou imulinu. 14 Ia aitenga mo vote'i ane ulai no tualasou mauli ne kitu'asi, la ta mitema ta ta'eisi i'unalai no anu.

Ovu Xe Ngiaxu

(Luk 6:43-45)

15 ^gNgingi ngasaxi laixe noxi'a ta mitema sou palomatana kalakalavoi, xo ane'i itokolomoxu sipsip laxusou no ale no vasime'a, ia opone'i ne loxo ta a'aa ta vova. 16 ^hLa sou nenge tatongone'i ta mitema sou palomatana kalakalavoi aloxo, nenge tatongonu ovuovu no anu ngiangiaxu. La sou ta mitema imomomosou ielexu ovu ngiaxu no anu xuxua uasi mo uaini ngiaxu no anu lamota anaanaxu uasi. 17 Aloxo ne la ovuovu laixe ne unene'a la uxalixu temanu laixe ia ovuovu ane masua unene'a la tematemanu ne anu masua. 18 Ovu laixe umomomo sou unene'a la temanu masua uasi, mo ovu masua anu umomomo sou unene'a la temanu laixe uasi. 19 ⁱOvuovu tavu'alo ane ne ulavusou unene'a laixe uasi, la ixeta'u ka ileanu ulu'elai no navu. 20 ^jAloxo ne la sou ngingi ngatoxonu itemasou palomatana kalakalavoi xe itemasou palomatana manina no anu 'ilixo noxi'a aloxo ngatoxonu ovuovu ne no anu ngiangiaxu. 21 ^kIa ngingi ngaxavutala lexe ta mitema e ilavusou imoxo'ilo lexe tila tila i'unalai no anu saxisaxila'u no opo loxotolo. Uasi. Ia 'ei ane umulinu masaxa noxou Mamilo muxolu teitexi no opo loxotolo anu si a u'unalai no anu saxisaxila'u noxou Lataua. 22 No 'a voxo sou vaivaikala tila noxou Lataua la ta mitema tavu'alo ivikalaleli aloxo 'o, ‘Tila Tila nexi e texaxai loxo ta mitema sou palomatana no ualasine ano, mo nexi tekusai'a ta uleenu ta masumasua no ualasine xe nexi te'oxonu sosovo tavu'alo ano.’ 23 ^lLa eni avikala lamana noxi'a aloxo 'o, ‘Eni alavusinge sevile uasisi manina, ngingi ngamitema sou nga'oxo'oxonu 'ili'ilixo masumasua ane, ngalai va'axu.’

Ta Mitema Tamei Mitulusou Tani

(Luk 6:47-49)

24 Aloxo ne la sou lexe ane'i ane ilomusou mo imulinu vaivaikala noxilo 'o, mo imuxaxu no tane'i, la ane'i aloxo itema e xavutalau laixe la mutulusou taasou teitexi no kulukisou. 25 La'iua usili la ulu'e mo lexa uanianipaa mo atume uili une'e utuvu vaxa no anu tani ne, la tani ne umomomosou ulapau uasi. Xo anu mutulu teitexi no anu kulukisou. 26 Ia ane'i ane ulomusou vaivaikala noxilo 'o, ia imuxaxu no tane'i mo imulinu uasi, la ane'i aloxo itema e xavutalau laixe uasi, la mutulusou taasou teitexi no i'oii'oi. 27 La'iua musili mulu'e mo lexa muanianipaa mo atume muili mune'e musu'a vaxa no anu tani ne la mulapau. Anu mulapau ne la masua avile.” 28 Iesu muxalilixu vaikala ne mukalu, la ta mitema tavu'alo mikuluke manina no anu vaikala noxou. 29 ^mXo Anu mulosi'a lavulavu ne loxo ta mitema sou lapuloto ilavusou i'oxo'oxonu uasi, ia Anu mulosie'i loxo itema e anu muno'u xavi sou u'oxonu.